Rep. Maza may bwelta kay Palparan

“Mga kambal na asong ulol sila sa Kongreso!” Ito ang bansag ni Gabriela party-list Rep. Liza Maza kina Bantay partylist Rep. Jovito Palparan at Aliance for National and Democracy (ANAD) partylist Rep. Pastor Alcover matapos akusahan ang Fil-Am activist na si Melissa Roxas bilang miyembro ng New People’s Army.

“Tila iyang si Palparan at ang kambal niyang si Alcover ay mga asong ulol sa loob ng Kongreso na walang ibang alam kundi ang kumahol at magkalat ng rabis,” ani Maza.

Ayon sa kongresista, ang pag-aakusa ng dating military official na si Palparan at ni Alcover kay Roxas ay isang ‘rehashed accusations’ katulad ng pag-aakusa nila kay Bayan Muna party-list Rep. Satur Ocampo kung saan ang kasong rebelyon nito ay matagal nang ibinasura ng Korte Suprema.

Aniya, tila tinatamaan sila ng mga akusasyon ni Roxas na mga miyembro ng militar ang siyang dumukot at nag-torture sa loob ng kampo ng militar noong nakaraang Mayo kaya nagawang akusahan ang dalaga na miyembro ng NPA.

“They appear to be so defensive amidst allegations that they have a hand in the string of human rights abuses in the country,” pagbibigay-diin pa ni Maza.

Binatikos din nito si Alcover sa pagiging walang modo nito nang akusahan nito si Commission on Human Rights (CHR) chairperson Leila de Lima na may koneksyon umano sa mga komunista.